მწერალმა და ეროვნული ბიბლიოთეკის გენერალურმა დირექტორმა, გიორგი კეკელიძემ სოციალურ ქსელში ატვირთა ფოტო, სადაც დაკლულ ღორს მდუღარე წყლის დასხმით ჯაგარს აცლიან, როგორც დასავლეთში ამბობენ – პუტავენ. ეს არის კადრი დოკუმენტური ფილმიდან, “ზურიკოს კალანდა”, რომელიც გიორგიმ ნათელა გრიგალაშვილთან ერთად, 13 იანვარს, ჩოხატაურში გადაიღო.
ფოტოს უარყოფითი გამოხმაურება მოჰყვა. ითქვა, რომ არ შეიძლება ამის გადაღება და მით უფრო, სოციალურ ქსელში მისი ასე ტირაჟირება, რადგან ეს შეიძლება ცხოველებზე ძალადობის წახალისება იყოს.
გიორგის პოზიცია კი ასეთია.
“მე გავიცანი ეს კარგი ადამიანები, რომლებიც ასე ფიქრობენ. უმეტეს საკითხში, ძალიან სწორად აზროვნებენ. ეს კადრი ფილმიდან არის და მე უბრალოდ მგონია, რომ ხელოვნებამ უნდა ასახოს ყველაფერი. მათ შორის, ისეთი რამეც, რაც შეიძლება ერთისთვის მოსაწონი იყოს და მეორესთვის – არამოსაწონი. ეს ჩვეულებრივი ამბავია და ამას უნდა შევეგუოთ. ხელოვნება და პოლიტკორექტულობა ერთად ვერ ცხოვრობს” – ამბობს კეკელიძე “პრაიმამბებთან”.
