თეატრებმა ოფიციალურად დღეს განაახლეს მუშაობა. სცენები რეპეტიციებით გაცოცხლდა. აპრილის პირველ რიცხვებში პრემიერების მრავალფეროვანი აფიშა გვექნება.
მაყურებელი სპექტაკლზე პირბადით, სკამის გამოტოვებით, ჭადრაკულად მოთავსდება. მისი ვიზიტი თეატრში სამ საათს არ აღემატება. სპექტაკლი ერთმოქმედებიანი იქნება, უანტრაქტო.
რუსთაველის თეატრი 142-ე სეზონის გახსნისთვის ემზადება. 2, 3 და 4 აპრილს თეატრში ნახავთ რობერტ სტურუას სპექტაკლს – “ერთხელ… მხოლოდ…” (ზმანება ერთ აქტად). დრამატურგიაც სტურუასია და მუსიკალური გაფორმებაც. სპექტაკლში დაკავებულნი არიან დასის მსახიობები, მათ შორის – მარინა კახიანი, გოგა ბარბაქაძე, მანანა აბრამიშვილი, ქეთი ხიტირი, დათო გოცირიძე, ეკა მოლოდინაშვილი, ნინო არსენიშვილი, ანა ამილახვარი…
სპექტაკლის დადგმა რეჟისორს გასული წლის მარტში ჰქონდა დაწყებული. მერე მოხდა ის, რაც მოხდა… და დღეს განახლებული რეპეტიციიდან “პრაიმამბებს” ინტერვიუს აძლევს მსახიობი გოგა ბარბაქაძე.
გოგა ბარბაქაძე: – გადარეული ველოდებით 2 რიცხვს. საკმაოდ რთული იყო ჩვენთვის, მსახიობებისთვის, მაყურებლის გარეშე ცხოვრება. გარდა უმუშევრობისა, მსახიობისთვის კატასტროფაა უსცენობა.
მოვახერხებთ და კარგ ფორმაში წარვდგებით მაყურებლის წინაშე. რა დატვირთვითაც ვიყავით, იმ დატვირთვით წარვდგებით. ასე რომ, მაყურებელი ჩვენგან ამ პაუზას ვერ იგრძნობს.
პირბადეებით ვრეპეტიციობთ. დისტანციასაც შეძლებისდაგვარად ვიცავთ.
2 აპრილს ექვს საათზე გვაქვს პრემიერა, თუ ცხრა საათიანი კომენდანტის საათი არ მოიხსნება, ამ დროით ვითამაშებთ. სპექტაკლი საათსა და 25 წუთს გაგრძელდება.
მთლად კომფორტულად არ ვართ. ნიღბით რეპეტიციის გავლა დისკომფორტია, აბა, რა არის?! თამაშის დროს მოვიხსნით, სამაგიეროდ, მაყურებელს ეკეთება.
ამ სპექტაკლში ტექსტი არ გვაქვს. არც ერთი პერსონაჟი ხმას არ ვიღებთ. მოქმედებაშია მთელი სპექტაკლი. საინტერესო დადგმაა, მასიური სცენებით, მაღალი დონის განათებითა და მხატვრობით.
მე მაქვს დირიჟორის და პროფესორის როლი, რომელმაც შექმნა ადამიანი-რობოტი.
10 აპრილს უნდა ვითამაშოთ “თამაშის დასასრული”. სამჯერ გვაქვს ნათამაშები და ფაქტობრივად, ისიც პრემიერად შეიძლება ჩაითვალოს.
მარჯანიშვილის თეატრს სამ აპრილს აქვს პრემიერა. დოსტოევსკის “დანაშაული და სასჯელის” თამაშობენ, ლევან წულაძისა და თემო კუპრავას დადგმით.
თამუნა ლალიაშვილი (თეატრის საზოგადოებასთან ურთიერთობის უფროსი): ჯერჯერობით სპექტაკლები მხოლოდ შაბათ-კვირას გვექნება. დასაწყისი 4 საათზეა, სპექტაკლის ხანგრძლივობა 2 საათი და 20 წუთია. კომენდანტის საათიდან გამომდინარე ამ რეჟიმში ვიქნებით. როდესაც კომენდატის საათი მოიხსნება, მერე ჩვეულ რეჟიმში გადავალთ.
