ავთო აბესლამიძე პირველი მომღერალია რომელსაც კორონავირუსი დაუდგინდა. ის მკურნალობას სახლში გადის.

ვისგან დაინფიცირდა და როგორ გრძნობს თავს, ამის შესახებ „პრაიმამბებს“ ავთო აბესლამიძემ თავად უამბო.

– ავთო, როგორ ხართ ახლა?

– მეათე დღეა რაც კორონავირუსი დამიდასტურდა  და მაქვს სიცხე. ორი დღე დავაკვირდები და შემდეგ მივიღებ გადაწყვეტილებას. იყო საუბარი კლინიკაში მოხვედრაზე, მაგრამ რთული არ იყო ჩემი მდგომარეობა, ფილტვების ანთება არ მაქვს და ბინაზე გავდივარ მკურნალობას. როდესაც ვირუსი დამიდასტურდა, მოვიდნენ ჩემთან სამედიცინო სფეროს წარმომადგენლები, შეამოწმეს პირობები და დამტოვეს თვითიზოლაციაში.

თან ასე უფრო კომფორტულად ვგრძნობ თავს. ბევრ სითხეებს ვსვამ, თავს ბევრად უკეთესად ვუფრთხილდები ვიდრე ამას საავადმყოფოში ან კოვიდ სასტუმროში მოვახერხებდი.

ექიმები სულ მირეკავენ. თავიდან ვიყავი მისული და როცა ფილტვები სუფთა აღმოჩნდა დავმშვიდდი, ყნოსვა დაკარგული მაქვს. სიცხე 37.1 მაქვს, ამბობენ რომ კორონავირუსი გადამდები იმ შემტხვევაშია, როდესაც ტემპერატურა 37.5-ზე მეტია, მაგრამ მე მაინც სახლში ვარ და არსად არ გავდივარ.

– ვისგან დაინფიცირდით?

– დედისგან დავინფიცირდი, ის სამსახურში დაინფიცირდა კორონავირუსით. მან ეს ვირუსი 15 დღეში დაამარცხა, ჯერ კლინიკაში მკურნალობდა, შემდეგ კოვიდსასტუმროში გადაიყვანეს. ძალიან ვნერვიულობდი დედაზე, მაგრამ ღვთის წყალობით ახლა ყველაფერი იდეალურად არის.