ტანმოვარჯიშე ქეთი ხატიაშვილი საზოგადოებამ “ცეკვავენ ვარსკვლავებიდან” გაიცნო. ქეთის პროექტმა დიდი პოპულარობა მოუტანა, თუმცა მისი მიზანდასახულობის წყალობით, გამარჯვებულიც გახდა და მას შემდეგ, მისი კარიერა წარმატებით ვითარდება.
ქეთი ბავშვობაში უკრაინაში ცხოვრობდა, ის დედით უკრაინელია. საქართველოში ჩამოსვლის შემდეგ, აქ ადაპტირება გაუჭირდა, თუმცა დაისახა მიზანი და უკვე ტანვარჯიშის რამდენიმე ცენტრი აქვს.
ტანმოვარჯიშეა ქეთის ქალიშვილიც, რომელიც დედისნაირი მიზანდასახულია. ქეთის არ უყვარს ინტერვიუები, თუმცა ცოტა ხნის წინ ანასტასიასთან ერთად “იმედის დღის” ჟურნალისტს უპასუხა.
ანასტასიამ თქვა, რომ მას სურს კოსმონავტი გამოვიდეს.
ქეთიმ სპორტულ კარიერაზე უარი 21 წლის ასაკში თქვა, რასაც ნანობს.
“ყველაზე რთული იყო ადაპტაცია, როცა სპორტს თავი დავანებე, ის ხელფასები და პრემიები აღარ მქონდა. ამიტომ საჭირო გახდა სამსახურის მოძებნა.
მაშინ ცენტრიდან შორს, დიდი დიღმის ბოლოში ვცხოვრობდით. ნებისმიერ სამსახურს ვეძებდი ჯიბის ფულისთვის, ერთ-ერთ ამერიკულ ფიტნეს-ცენტრში დავიწყე მუშაობა. დილის შვიდის ნახევარზე მივდიოდი ავტობუსით სამსახურში და 8 საათიდან ვმუშაობდი. ცოტა შეშინებული ვიყავი მაშინ, მახსოვს სულ ვფიქრობდი, ახლა რა იქნება და როგორ იქნება.
ახლა მომწონს რასაც ვაკეთებ. მწვრთნელობა არ მღლის და ბავშვებთან მუშაობა მაბედნიერებს” – განაცხადა ქეთიმ გადაცემაში.
