რამდენიმე დღის წინ, კორონავირუსით კიდევ ერთი ქართველი მომღერალი ნათია დუმბაძე დაინფიცირდა.
ის ერთი დღით ინფექციურ საავადმყოფოში გადაიყვანეს, საიდანაც უკვე გაწერეს და მკურნალობის კურსს ახლა სახლში გადის.
– ნათია, როგორ გრძნობთ თავს?
– ახლა თავს უკეთე ვგრძნობ, სიცხეები აღარ მაქვს. ხველა და ყელის ტკივილი არც მქონია, უბრალოდ სისუსტე მაქვს. ზუსტად ვერ გეტყვით საიდან დავინფიცირდი. მე ვიცავდი რეკომენდაციებს ზედმიწევნით.
როგორც კი შევატყვე თავს, რომ რაღაც სიმპტომები მქონდა, თვითიზოლაციაში გადავედი. მესამე დღეს დამეწყო ჰაერის უკმარისობა. აივანზეც რომ გავსულიყავი ამოვისუნთქავდი, მაგრამ პანიკას ავყევი და გადავედი ინფექციურ საავადმყოფოში. გამიკეთეს კატე, ზუსტად მაგ დროს გაწერეს ერთ-ერთი პაციენტი და გამიმართლა. ერთი ღამით დამტოვეს კლინიკაში.
ერთ პალატაში სამი ადამიანი ვიყავით. მძიმე სიტუაციაა, მთელი ღამის მანძილზე მანქანა-მანქანაზე მოდიოდა. აშკარაა მთელი ქალაქი დაინფიცირებულია.
არც ჟანგბადის აპარატი დამჭირდა და არც დანიშნულება მოუციათ. უბრალოდ ვიტამინებს ვსვამ.
– შვილებიც იზოლაციაში გყავთ?
– შვილები ბებიასთან მყავს, გამოვიძახე ლაბორატორია, მათაც გავუკეთე ტესტი და ღმერთის წყალობით არ დაუდასტურდათ.
ვურჩევ მოსახლეობას ზედმიწევნით დაიცვან წესები და თუ მაინც დაინფიცირდებიან, არ აჰყვნენ არანაირ პანიკას.
ვერ ვიტყვი რომ ჩვეულებრივი ვირუსია. რადგან ვიცით, რომ საშიში ვირუსია და კლავს, ალბათ იმიტომ მოქმედებს ემოციურად ადამიანებზე.
ადრე არ მქონდა ტელეფონზე ლაპარაკის თავი, მაგრამ ახლა ვცდილობ ხშირად ვესაუბრო მეგობრებს და ასე გამყავს დრო.
მინდა მადლობა ვუთხრა ყველა ექიმს, რომლებიც დღემდე მირეკავენ და კითხულობენ ჩემს ამბავს.
