ლევან ყოჩიაშვილი, რომელიც საზოგადოებამ დათო გოცირიძის (ჩცდ) სახით შეიყვარა, ახალ იმიჯში – წვერში, ძალიან ჰგავს თავის ამერიკელ კოლეგას – ჯორჯ ქლუნს. მსახიობი ამ შედარებამ გაახალისა და “პრაიმამბებს” თავისი შეხედულება გაუზიარა.
ლევან ყოჩიაშვილი: – ხშირად მამსგავსებენ. ახლა თქვენც რომ მიმამგსავსეთ, გამეცინა. ბევრს უთქვამს, ჯორჯ ქლუნს გავხარო. მე ვერ ვაკეთებ მსგავსებას.
ეტყობა, რომ გავჭაღარავდი და ასაკიც მომემატა, დავემსგავსე. ერთი მეც უნდა დავაკვირდე (იცინის).
ახლა წვერს ვატარებ. დათოს როლის გამო წვერი აქამდე არ მიტარებია. ერთხელ, დათოს უმუშევრობის პერიოდი ჰქონდა და მოუხდა. მოკლე სეზონი იყო, მეც სინჯების დროს მომეწონა და დამრჩა და გამომყვა. უკვე ნახევარი წელია წვერს ვატარებ.
სერიალი რომ გაგრძელდება, წვერსაც დავემშვიდობები.
ახლა “ფორმულაზე” სატელევიზიო ანონსების გახმოვანებით ვარ დაკავებული. ტელევიზია ხმის გარეშე ვერ იქნება, საჭიროა, ამიტომაც ეს საქმე მაქვს ჯერჯერობით. ფილმებს და სერიალებს არ ვახმოვანებ. მხოლოდ ანონსები.
ჯერჯერობით, არაფერი ისმის ჩცდ-ს გადაღების შესახებ. ფიქრობდნენ, რომ ნოემბრის ბოლოს დავიწყებდით, მაგრამ არ გამოვიდა. ბევრი ხალხია “ჩცდ”-ში დაკავებული და ამ სიტუაციაში არ შეიძლება. შემქმნელებმა ჯერ არ იციან, როდის დაიწყება.
ამდენი წელია რომ მიჩვეული ვარ ამ როლს და სერიალს, ძალიან მიჭირს მის გარეშე, მაგრამ რას იზამ, ამ ვითრაებაში, ვერაფერსაც ვერ მოიმოქმედებ. მთელი მსოფლიო გაჩერებულია.
