კორონავირუსმა ია ფარულავას ოჯახის წევრი, მსახიობის უსაყვარლესი მამიდა დოდო ფარულავას სიცოცხლე შეიწირა.
დოდო ფარულავა 87 წლის გახლდათ და ამერიკაში ცხოვრობდა, კორონავირუსით ის სწორედ ამერიკაში გარდაიცვალა, თუმცა საქართველოში გადმოსვენებისას ცხედარი დაიკარგა, რასაც ია ფარულავას და ოჯახის წევრების აღშფოთება მოჰყვა.
ჩამოასვენეს თუ არა საბოლოოდ თბილისში დოდო ფარულავა, ამის გასარკვევად “პრაიმამბები” მსახიობ ია ფარულავას დაუკავშირდა.
– ქალბატონო ია, ჩამოასვენეს თქვენი მამიდის ცხედარი თბილისში?
– ჩამოასვენეს და დავკრძალეთ უკვე. პირველ ღამეს როცა უნდა ჩამოესვენებინათ, დაიკარგა მიცვალებული, არ ჰქონდათ პასუხი. ჯერ გვითხრეს შეიძლება ნიუ-იორკშიაო, ამაზე საერთოდ გავგიჟდით.
შემდეგ სანამ სიუჟეტი არ გავიდა კურიერში, არაფერი ეშველა. სიუჟეტის ეთერში გასვლის შემდეგ, თურქეთის ავიახაზების გენერალურმა მენეჯერმა დამირეკა, ბოდიშები მომიხადა.
გასაგებია, შესაძლებელი იყო ადამიანური შეცდომა მომხდარიყო და ერთი პალეტიდან, მეორეში არ მომხდარიყო გადატანა, მაგრამ ლასარე ტერმინალშიც უყურადღებობის პიკი იყო. როცა მივედით აერპორტში და გვითხრეს არ ჩამოსულაო ამაზე გავგიჟდით.
გუშინ დილით დავკრძალეთ მამიდა, მივაბარეთ მიწას და როგორც იქნა დავწყნარდით.
– ცნობილია, რომ განსაკუთრებული ურთიერთობა გქონდათ, რას გვეტყვით დოდო მამიდაზე?
– დოდო მამიდა ჩემთვის იყო მეორე დედა. დედაჩემს თუ არ ჰქონდა ნერვი და სურვილი ჩემთან ეთამაშა სალონობანა, მზარეულობანა, დოდო ყველაფერს აკეთებდა ჩემთვის. პირველი სილამაზის წიგნი, დოდო მამიდას სახლში ვნახე და წავიკითხე.
დოდო მამიდას დავყავდი ყველგან, მივლინებებში, დასასვენებლად. ძალიან ყურადღებიანი მამიდა იყო.
ბოლო 17 წელი, როგორც ქართველი ქალბატონების უმეტესობა ის წასული იყო სამუშაოდ ამერიკაში. 2015 წელს, ოჯახში დიდი ტრაგედია მოხდა, ჩამოვიდა და სამი წელი აქ დაჰყო.
ძალიან ენერგიული ქალი იყო და მიხვდა, რომ აქ არაფრის მოქმედების შანსი არ ჰქონდა, ამიტომ უკან გაბრუნდა ამერიკაში.
იქ მუშაობდა, 87 წლის იყო, მაგრამ როგორც 70 წლის ქალი ისე გამოიყურებოდა. ისეთი დამცველი როგორიც დოდო მამიდა იყო, მე არ მყავდა. სოციალურ ქსელში ყველას ეჩხუბებოდა, თუ ვინმე რამეს ცუდს დაწერდა ჩემზე.
როცა ავად გახდა, არ უნდოდა ჩვენთვის ეთქვა, იმიტომ რომ დოდო მამიდა ჩვენთვის იყო ძლიერი. “დოდო ვერ გახდება ავად”, “დოდო სულ არის”, ასეთი პროგრამით იყო და ჩვენთვის წამროუდგენელია, რომ დოდო აღარ არის.
