ლელა წურწუმიამ ზურა მანაგაძის ძველ სიმღერაზე “გიორგობის თვეო” ვიდეორგოლი გადაიღო. კლიპმეიქერმა, ნესტან სინჯიკაშვილმა, რომელთანაც არაერთხელ უთანამშრომლია ლელას, ამ სიმღერის ლოკაციად სამხატვრო აკადემიის დარბაზები შეარჩია.
როგორც იცით, აკადემიის დარბაზებმა რესტავრირება გაიარა, აღდგა და ერთ-ერთი ლამაზი საგამოფენო თუ საპრეზენტაციო სივრცეა. განახლებული აკადემიის გახსნა შარშან ივლისში შედგა.
ლელას ქმარი და მისი მუსიკალური პროდიუსერი, კახა მამულაშვილი აკადემიის რექტორს, მხატვარ გია გუგუშვილს მადლობა უხდის დარბაზების დათმობისთვის.
სიმღერის სახელწოდებიდან გამომდინარე, კლიპის პრემიერა 6 მაისს, გიორგობას, ლელას გადაცემაში შედგება.
როგორც კახა მამულაშვილმა “პრაიმამბებთან” თქვა, ზურას ამ სიმღერის რიმეიქი არავის გაუკეთებია და ეს პირველი შემთხვევაა.
კახა მამულაშვილი: – აკადემია გადასაღებად ნესტანმა შეარჩია და ლელას სურვილიც იყო. სხვადასხვა კაბით იხილავთ კლიპში, თავის ამპლუაში იქნება. მაქსიმალურად ესთეტიური კლიპი გამოვა. ლელასაც ძალიან უნდოდა მსგავსი ვიდეორგოლის გადაღება. მოკლედ, მისი ამპლუაა (იცინის).
კლიპში ხუთი კაბა აცვია. ნაწილი ლელას დიზაინით არის შექმნილი და ასევე, სპეციალურად ამ კლიპისთვის, შავი გიპიურის კაბაზე იმუშა დიზაინერმა დათუნა სულიკაშვილმა. ვარცხნილობა გიორგი ელიაძეს ეკუთვნის. ფოტომასალა კი ჩემმა მარიამმა გადაიღო.
