“ფორმულა” ახალ გადაცემას იწყებს. დავით ლაბაძე, რომელსაც მაყურებელი “კაცების შოუთი” იცნობს, ამჯერად პროდიუსერის რანგში ცდის ბედს. კაცების შოუს მეიქერი, ახლა გადაცემა “ქალებზე” მუშაობს. ასე ერქმევა ახალ ტელეპროექტს, რომელსაც ოთხი წამყვანი ჰყავს – ნანუკა გულუა, სალომე შარვაძე, ალექსანდრა პაიჭაძე და თეონა ლეჟავა.
აქედან ორ წამყვანს ჩცდ-დან ვიცნობთ – ქეთი და დოჩი ახალ ამპლუაში ცდიან თავს.
პირველი გადაცემა 9 აპრილს, პარასკევს, 22 საათზე გადის ეთერში.
ნანუკა გულუა, რომელიც მაყურებელმა დოჩი ალიშბაიას როლით შეიყვარა, “პრაიმამბებს” უყვება, რომ “ქალები” სახალისო, ლაღი და განსატვირთი გადაცემა გამოდის.
ნანუკა გულუა: – არ გეგონოთ, რომ ეს მხოლოდ ქალების საყურებელი შოუ იქნება. ქალებზე მეტად მათი ქმრები იხალისებენ, კიდევ უფრო მეტად გაერთობიან შვილები, დედამთილები ხომ საერთოდ. რა თქმა უნდა, სტუმრები მხოლოდ ქალები არ გვეყოლებიან.
ვეხებით ყველა თემას, ჩვენეულად, სახალისოდ, მსუბუქად და ლაღად.
– ნანუკა, როგორ გგონიათ, რატომ დაგინახეს ამ გადაცემის წამყვანის ამპლუაში?
– ყველაზე კომფორტულად ვგრძნობ თავს ტელევიზიაში. დღეს სიყალბე, დაყენებული მანერა და ნასწავლი ტექსტი აღარ იყიდება. მგონია, რომ დღეს ისე, როგორც არასდროს, ადამიანები გრძნობენ ნამდვილად როგორ ფიქრობ, ნამდვილად როგორ იცინი და ყვები. ზუსტად ვიცი, რომ ამ გადაცემით ყველა ისიამოვნებს. ადამიანების გახალისება და მოვლენების სასაცილოდ მოყოლა, ჩემი საყვარელი საქმეა და თუ ამას პროფესიად ვაქცევ, ეს უკვე ძალიან მახარებს.
ამ გადაცემით მე გამიცნობს მაყურებელი. მათ ხომ არ იციან, რას ვფიქრობ მე ქალზე, კაცზე, ჩემი კომპლექსები რა არის, სახალისო ისტორიები… გახსნილად მოვყვები ჩემს შესახებ, უახლეს მოვლენებზე გავაკეთებ ანალიზს.
– პოპულარობამ როგორი გაგხადათ?
– მე იმ იშვიათ ადამიანთა სიაში ვარ, ვინც ძალიან უყვართ და ვისაც არ ტკენენ. მე ჩემს თავზე უარყოფითი გამოხმაურება არსად წამიკითხავს.
– ეს დოჩის დამსახურებაა?
– ალბათ. მიუხედავად იმისა, რომ ბობოქარი ქალია, მაინც სასაცილოა. ეს სიყვარულიც მისი დამსახურებაა. გამიმართლა. დოჩიც უყვართ და როგორც ჩანს, ნანუკაც. ჩემს ინტერვიუებსაც სიყვარულით ეხმიანებიან.
– მოგწონს ახალი გამოწვევა?
– მომწონს. საერთოდ, ძალიან თავდაჯერებული არ ვარ. შეიძლება მტკიცე და თავდაჯერებული ვჩანვარ, მაგრამ ასე არ არის. სულ ვამოწმებ, ის, რაც მე მგონია, რომ კარგია, არის თუ არა რეალურად ასე. მერე როცა შეფასებით ფიდბექს ვიღებ, ვრწმუნდები, რომ სწორ გზას ვადგავარ და მიხარია.
ხუთი-ექვსი თვეა ვემზადებით ამ გადაცემისთვის. ჩვენ რომ არ დავმეგობრებულიყავით, ვერ შევძლებდით მის წაყვანას. მე და სალომე შარვაძე წლების მეგობრები ვართ. ისე მეკომფორტულება, მინდა, რომ ყველგან გვერდით მყავდეს. ეს გოგო მაბედნიერებს. თეონა და ალექსანდრა ჩვენი განუყოფელი ნაწილი გახდა. დანარჩენი გადაცემაში ნახეთ.
– თქვენი ცხოვრების “ტონი” ისევ არ ჩანს?
– ჩემი ცხოვრებვის ტონი რომ გამოჩნდება, მე მას ისეთ დღეში ჩავაგდებ, სად იყო ამდენი ხანი, სად დაბოდიალობდა, სად? მოილევს ყველაფერს და მოვა მერე…
საერთოდ ყველაფერი ისეა, მე როგორც ჩავიფიქრებ და ვიშრომებ. არაფერი მეჩქარება.
– დოჩის უმატებთ ახალ პლასტს?
– დოჩის ისეთი სიახლე ემატება სერიალში, თქვენ ჯვარი გწერიათ! (იცინის) სახეცვლილი იქნება თუ კიდევ ერთ უნარაღმოჩენილი, ხვალიდან ნახავთ.
დოჩის სცენარი ყოველთვის სახალისოა. თავიდან ზეპირად ვსწავლობდი მთელ ტექსტს და არ ვუხვევდი არც ერთ სიტყვას. ტელეფონის ნომერსაც ზუსტად ვამბობდი. მერე ქეთიმ დაიწყო ფრჩხილებში დაწერა, ეს თქვას მეგრულად, როგორც მეგრელი ქალი იტყოდაო. მივხვდი, რომ მან მომცა საშუალება, რომ ჩემი ინტერპრეტაციით მეთქვა და ფრთებიც გავშალე. მეგრული სიტყვები, რასაც დოჩი ისვრის, ჩემი ინტერპრეტაციაა.
– რაში გეხმარებათ მეგრელობა?
– (იცინის) ყველა წამყვან პოზიციაზე მეგრელია, სადაც შედიხარ გასაუბრებაზე. HR რომ მეგრელი დაგვხდება, მერე თავი ქუდში გაქვს. ერთმანეთის გატანა რომ ვიცით მეგრელებმა, ეს საიდუმლო არავისთვის არ არის. მეგრელი მეგრელს კარგი თვალით უყურებს და ათი ნაბიჯით წინ ხარ (იცინის).
ყველაფრის ლამაზად თქმა ვიცი. რაც არ უნდა მტკივნეული რამ მქონდეს ადამიანისთვის სათქმელი, მოვძებნი გზას, რომ უმტკივნეულოდ მივაწოდო ინფორმაცია. სხარტი ვარ, მალე მაფიქრდება ყველაფერი. სისხარტე კი ყველაფერში მეხმარება.
