“ბასტი-ბუბუ” შენობის გარეშეა. მის ხელმძღვანელობას, სახელმწიფო, პანდემიის დროს დაგროვილი იჯარის გადახდას სთხოვს. შეიძლება ბავშვებისთვის საყვარელმა 28 წლის სტუდიამ არსებობა შეწყვიტოს. შეიქმნა პეტიცია – გადავარჩინოთ “ბასტი-ბუბუ”. საჭიროა 10 ათას ხელმომწერზე მეტი, რომ სახელმწიფომ საკითხი განიხილოს და სტუდიას არენდის საფასურის გადახდის გარეშე გადაეცეს ის შენობა, რომელშიც 90-იანი წლებიდან მოყოლებული ბუდობს “ბასტი-ბუბუ”.
ამ პრობლემაზე საუბრის შემდეგ გადაცემაში “შენი დილა” სოფო ბათილაშვილმა სიმღერა “ხელები” შეასრულა. სიმღერის დროს ემოციები ვერ შეიკავა და ატირდა ნათია ბანძელაძე, რომელიც ამ კონკრეტულ მომენტში მის მეუღლეს, გოგიჩას წარმოადგენდა.
ნათია ბანძელაძე: – დღეს “გოგიჩამ” თავის ფრთები მათხოვა. ბევრი ვიფიქრე, მქონდა თუ არა უფლება მისი სახელით მესაუბრა. რაც მას ჰქონდა, შეუძლებელია მე მოვიტანო თქვენამდე, მაგრამ, ზუსტად ვიცი, რომ იმ სიყვარულს, რომელსაც ის ატარებდა, იმ ემოციას, რომელიც მისთვის ბასტი-ბუბუ იყო, მოგაწვდენთ!
დღეს გოგიჩას ფრთებით მოგაწვდით ყველას! და ზუსტად ვიცი, სიყვარული სასწაულებს ახდენს! შეუძლებელია ეს ბედნიერების ბუდე – ბასტი-ბუბუ დაინგრეს, სადაც სიყვარულს, სიკეთეს და ცხოვრების მთავარ ღირებულებებს ასწავლიან!!!!
თქვენ, სხვა სამყაროს ადამიანებო, თქვენ უფრო გვჭირდებით ჩვენ.
