“ჩემი ცოლის დაქალების” შემოქმედებითი ჯგუფი მობილიზებას იწყებს. ტექნიკურმა რეჟისორმა მსახიობებს ჩამოურეკა, თებერვალში გადაღებას ვიწყებთ და სერიალში სათამაშოდ ხომ ისევ მზადყოფნაში ხართო.
მსახიობები ძალიან ბედნიერები არიან. პაუზის გაწელვამ საქმე მოანატრათ. სერიალის გარეშე, ყველა მათგანს ძალიან უჭირს.
“ძალიან მომენატრა ყველა, ოჯახის წევრებივით არიან. იმხელა პაუზა გამოვიდა, რომ უკვე ერთი სული მაქვს, როდის დავიწყებთ გადაღებას. ძალიან მომენატრა მუშაობა. ჩვენ უკვე უერთმანეთოდ ვეღარ ვძლებთ” – გვეუბნება ნინო გაჩეჩილაძე, იგივე კატო კირვალიძე.
“მომენატრა საქმე, დათო გოცირიძემ ცხოვრების ამხელა ნაწილი წაიღო. ახლა წვერს ვატარებ და თუ მალე დავიწყებთ გადაღებებს, მომიწევს წვერთან გამომშვიდობება. ეს წვერი მაგ კაცის სტილი არ არის” – ამბობს ლევან ყოჩიაშვილი.
ლამარას როლის შემსრულებელმა, ზუგდიდის თეატრის მსახიობმა, მარინა დარასელიამ, კოვიდ-19 ოქტომბერში დაამარცხა და ახლა, როგორც ამბობს, უშიშრად ემზადება საყვარელ სერიალში სათამაშოდ. ზუგიდიდის თეატრის მსახიობს, რომელმაც რამდენიმე ათეული წელი გაატარა ამ პროფესიაში, ასეთი გაყინული პერიოდი არ ახსოვს. და მასაც ერთი სული აქვს, როდის დაკავდება საყვარელი საქმით.
მარინა დარასელია: – დამირეკეს, თებერვალში ვიწყებთო. მეც ველოდები, ჩემს როლზე როდის დამიძახებენ. სერიალს და მით უმეტეს, “ჩცდ”-ს მეგრელების ხაზს სამეგრელოში იმხელა რეიტინგი აქვს, რომ არ არსებობს, ქეთი დევდარიანმა ჩვენზე არ დაწეროს. მთელი ზუგდიდი და სამეგრელო ფეხზე დგას, როდის დაიწყება ახალი სერიები. მოკლედ, ასე ველოდებით, რა სცენარი დაიწერება.
მომენატრა საქმე. კორონავირუსზე რომ ვიმკურნალე და კლინიკიდან გამოვედი, ერთი თვის შემდეგ, თეატრში სპექტაკლი “უხერხემლო” დავდგით, უმაყურებლოდ ვითამაშეთ და ვიდეო გადავიღეთ.
ასეთი გაჩერებული პერიოდი არასდროს მახსენდება. სულ რეპეტიციებში ვიყავი. საქმე, გადაღება… შარშან, 19 თებერვალს რომ ვითამაშე სპექტაკლი, მალე ერთი წელი გახდება, რაც სცენაზე არ მითამაშია. ეს მსახიობისთვის ისეთივე საშიანელებაა, როგორც, ვთქვათ, ინგლისურის მასწავლებელს გაკვეთილები რომ შეუჩერდეს, ექიმს – თავისი საქმიანობა. ერთი წელი უსაქმოდ ყოფნა ცოტაა?
პირბადით კი დავდივარ, მაგრამ დასნებოვნების შიში აღარ მაქვს. 3 ოქტომბერს დამიდასტურდა კოვიდი, თუმცა კოვიდნარჩენები მაინც მაქვს. დამარტყა მეხსიერებაზე. ზოგჯერ გათიშულობა მაქვს, მავიწყდება სათქმელი. რევმატული ვიყავი და მკლავი და ბეჭები მტკივა. კუჭნაწლავმა შემაწუხა, ყურის ანთებაც მქონდა…
სპექტაკლი რომ გადავიღეთ, სიტყვა დამავიწყდა უცებ და იმპროვიზაციით სხვა სიტყვა ჩავსვი.
მოკლედ, ასე, ლამარა თქვენთან შესახვედრად მზადყოფნაშია.
