რამდენიმე კვირის წინ, კორონავირუსმა ცნობილი ქართველი მაესტროს გოგი ბერიძის და მისი მეუღლის სოცოცხლე იმსხვერპლა. ამ ფაქტმა უამრავ ადამიანს დაწყვიტა გული, რადგან გოგი ბერიძეს მსოფლიო მუსიკალურ წრეებშიც შესანიშნავად იცნობდნენ.
მაესტროს და მისი მეუღლის დაინფიცირების შესახებ, “პრაიმამბებს” მათი შვილიშვილი, ცნობილი მწვრთნელი და სერიალ “ჩცდ”-ს მსახიობი გიორგი ორბელაძე ესაუბრა.
– გიორგი, საიდან დაინფიცირდნენ შენი ბებია და ბაბუა?
– დაინფიცირების წყარო ჩვენთვის უცნობია. პირველად ბაბუა დაინფიცირდა.
სიმპტომების გამოვლენიდან ორ დღეში ჩაუტარდა ტესტირება, მაგრამ უარყოფითი პასუხი მოვიდა. ამიტომ ორ დღეში ახალი ტესტი გაიკეთა და დადებითი პასუხი მოვიდა. მისი ჯანმრთელობის მდგომარეობა დამძიმდა, ამიტომ კლინიკაში გადაიყვანეს. მოგვიანებით ბებიასაც გამოუვლინდა სიმპტომები და ისიც კლინიკაში მოათავსეს.
– კლინიკაში დაიღუპნენ?
– არა. ბებია ორ კვირაში გამოწერეს. კორონავირუსისგან განკურნებული იყო, მაგრამ სუსტად გრძნობდა თავს. ამიტომ სულ იწვა ან იჯდა.
მეთორმეტე დღეს კი სავარაუდოდ თრომბით გარდაიცვალა. ბებიის გარდაცვალებიდან მეორე დღეს გარდაიცვალა ბაბუა.
– გაიგო ბებოს გარდაცვალების შესახებ?
– არა, ბაბუა რეანიმაციაში იწვა და იქ დაიღუპა. ფილტვების ანთება ჰქონდა და ვენტილაციის აპარატზე იყო შეერთებული. ბოლოს გული გაუჩერდა და გულით დაიღუპა. ბებია გარეთ საერთოდ არ გადიოდა, ბაბუა კი, ქუჩაში მხოლოდ ერთხელ იყო გასული და პირბადე ეკეთა.
– თქვით, რომ ბებია როცა კლინიკიდან გამოწერეს სუსტად იყო...
– ბებიაჩემი კლინიკიდან სასწრაფომ მოიყვანა სახლში. მეორე სართულზეა მისი ბინა და ზუსტად სამი საათი დასჭირდა სახლამდე ასასვლელად, რადგან გონებას კარგავდა. ვფიქრობ რომ იმ მომენტში კლინიკიდან არ უნდა გამოეწერათ.
– როგორი ურთიერთობა გქონდათ?
– არაჩვეულებრივი ურთიერთობა გვქონდა. დღემდე გაკვირვებული ვარ ბაბუაჩემის ინტელექტით.
ბებიას რაც შეეხება, დიაბეტი ჰქონდა და სახსრები აწუხებდა, მაგრამ როცა მივიდოდი, გეგონებოდა ფრთები შეისხაო. წამოხტებოდა და ყველაფერს აკეთებდა.
დღეგამოშვებით გამომეცალა ხელიდან ეს ორი ადამიანი და მძიმეა ჩემთვის.
– ცნობილია, რომ კორონავირუსით გარდაცვლილთა დაკრძალვა სპეციალური პროტოკოლით ხდება…
– ბებია ფაქტიურად სახლში დაიღუპა და კოვიდპაციენტად არ ითვლებოდა. ამიტომ ჩვეულებრივი წესით დავკრძალეთ.
რაც შეეხება ბაბუას, ის კლინიკაში დაიღუპა და რადგან კოვიდდადებითი პაციენტი იყო, არ შეიძლებოდა პანაშვიდის დროს, მისი სასახლის ახდა და გაპატიოსნება.
– ვინმე ახდენდა პანაშვიდის დროს მონიტორინგს?
– არა, ჩვენი ხარჯებით წამოვიღეთ სასახლე. ვიცოდით თავი არ უნდა აგვეხადა, თუმცა თუ დაირღვეოდა პროტოკოლის წესები, ამას ვერავინ გაიგებდა.
