ლილი ზღვაურის ჯანმრთელობის მდგომარეობა დამძიმდა – სოციალურ ქსელში ამ წარწერით ისევ გამოჩნდა დეზინფორმაციის შემცველი პოსტერი, რომელსაც “ფეისბუქზე” თავად ქეთი წიკლაური აზიარებს და აწერს, რომ ეს არ არის სიმართლე.
ქეთიმ “პრაიმამბებთან” ფეისბუქმომხმარებელთა ამ გაურვეველი ჰობის შესახებ კომენტარი გააკეთა.
ქეთი წიკლაური: – ვფიქრობ, რომ ამ დეზინფორმაციას ჩემმა პოსტმა გაუკეთა პროვოცირება. 3 მარტს ჩემი და დედას ფოტოები დავდე წარწერით – მინდა, რომ დიდხანს იყო ჩემთან.
როგორც მამაზე ააგორეს ჭორი, ისევე გააკეთეს ახლაც.
რა ვთქვა, არ ვიცი. მგონია, რომ ეს განათლების და კულტურის დაცემის შედეგია. გაფუჭებული ტელეფონი ისედაც უყვარდათ ჩვენთან და ახლა ეს ტელეფონი უფრო და უფრო გაბოროტდა.
მსგავსი რამის გადაუმოწმებლად დაწერა, კრიმინალია. ეთიკაზეც არ არის საუბარი.
ნამდვილად აღმაშფოთებელია ეს ყველაფერი.
მიაწვდინეთ ხმა, მეც მქონდა კოვიდი და ეგებ, მეც მიმაყოლონ და “გაგვიშვან” მთელი ოჯახი საიქიოში… “გავერთოთ” ცოტა. ეტყობა, რომანტიკულად მიაჩნიათ. თემური რომ გარდაიცვალა, ლილიც რომ ახლა წავიდეს, რომეო და ჯულიეტას რომანტიკული ისტორია გამოვა.
ვერ გეტყვით, ეს რა სიუჟეტია. მეც მიმაყოლონ და ბერძნულ ტრაგედიებში ჩავეფლობით. იმედია, მერე გაიხარებენ ამდენი გლოვით, ტირილით, “უი, დედას” ძახილით, ლოცვით, პოსტების გაზიარებით და ტირილის “სმაილების” წერით.
ან ეს რა არის – “გავაზიაროთ პოსტი და ვუსურვოთ ჯანმრთელობა”, ცრუ მართლმადიდებლობა წამოვიდა “ფეისბუქში”. რა უბედურებაა, ლოცვა თუ გინდათ, წადით ეკლესიაში და ჩუმად გააკეთეთ ეს.
