ეს ფოტო სოციალურ ქსელში ვირუსულად ვრცელდება. მამა-შვილი დღეს, აფრიკის დასახლებაში განვითარებული მოვლენების დროს გადაიღეს. საზოგადოების ნაწილი და ოპოზიციის წარმომადგენლები ფოტოს აქტიურად აზიარებენ და წერენ, რომ სხვებთან ერთად თბილისის მერიამ ამ ოჯახის კუთვნილი საცხოვრებელი სახლიც დაანგრია, თუმცა ირკვევა, რომ სინამდვილეში ეს მამა-შვილი იმ ტერიტორიაზე საერთოდ არ ცხოვრობს და არც მათი სახლის დემონტაჟი განხორციელებულა.
სოციალურ ქსელში ოჯახის ნაცნობები წერენ, რომ გავრცელებული ინფორმაცია, რომ მამა-შვილს სახლი დაუნგრიეს და ქუჩაში დატოვეს, ტყუილია.
ფოტოზე გამოსახული მამაკაცი ნუგზარ ალუაშვილია. ის აფრიკის დასახლებაში სუპერმარკეტ “ზღაპარის” უკან ცხოვრობს. მისი ახლობლები ასევე სოციალურ ქსელში წერენ, რომ მამაკაცი შემთხვევის ადგილზე მცირეწლოვან შვილთან ერთად შემთხვევით იმყოფებოდა.
აფრიკაში მომხდარ ფაქტს გამოეხმაურა მსახიობი ია ფარულავაც.
“სირცხვილი !!!! სირცხვილიიიიი !!!! კოშმარი !!!! ამის ავტორი და ამის ჩამდენი დასაჭერია და მისაცოცხი….” – დაწერა მან სოციალურ ქსელში.
მოგვიანებით, მან პოსტის ქვეშ კომენტარიც დაწერა: მეგობრებო როგორც გავაკვიე ეს მამა შვილი ცხოვრობს აფრიკაში სუპერმარკეტ ზღაპრის უკან . ამათი სახლი არ დაუნგრევიათ. უბრალოდ იქ იყვენენ . მოკლედ ეს ბავშვი თვითონ ჯართს აგროვებს ხოლმე მამა მშენებლობაზე მუშაობს და არის სოციალურად დაუცველი ოჯახი.
შეგახსენებთ, რომ დღეს თბილისის მერიამ აფრიკის დასახლებაში სახელმწიფოს კუთვნილ მიწაზე უკანონოდ აშენებული რამდენიმე შენობა-ნაგებობის დემონტაჟო მოახდინა, რასაც დაპირისპირება მოჰყვა.
