რამდენიმე დღის წინ, კორონავირუსით დეკანოზი დავით ქვლივიძე გარდაიცვალა. დეკანოზის გარდაცვალებას სოციალურ ქსელში ემოციურად გამოეხმაურა ადვოკატი მარიამ კუბლაშვილი.
“ჩემი პირველი მაზიარებელი, ჩემი მესაიდუმლე, ჩემი დამრიგებელი, ჩემი მამა დავითი” – დაწერა სოციალურ ქსელში ადვოკატმა.
“პრაიმამბებმა” მარიამ კუბლაშვილთან ინტერვიუ ჩაწერა, სადაც მან პირად მოძღვარზე დეტალურად ისაუბრა.
– დაუჯერებელია, რომ დაიღუპა. ის იყო შეუპოვარი და ძლიერი, ძლიერი რწმენაში და საკუთარ პრინციპებში.
პირველად წმინდა ნინოს ეკლესიაში, ჩიტაძის ქუჩაზე რომ იყო იქ მივედი მასთან, მისი ერთ-ერთი გამორჩეული მრევლის შუამდგომლობით. რთული პერიოდი მქონდა. 22 წლის ვიქნებოდი.
მისი შთაგონებით მე შევძელი მარხვის დაცვა, აღსარებაც პირველად მას ვუთხარი და მანვე მაზიარა. საკმაოდ მკაცრი იყო. ახლაც ყურში მაქვს მისი ხმა.
მხოლოდ მამა დავითმა იცოდა ჩემი ყველა საიდუმლო. მე მან მთხოვა რაღაც არ გამეკეთებინა და მაინც გავაკეთე, რის გამოც მისი თვალებში შეხედვა მრცხვენოდა.
– რას გიკრძალავდათ და მძიმე მომენტში როგორ გიდგებოდათ გვერდით?
– ის პირდაპირ გეტყოდა არ გააკეთო ეს. თუ შენს გვერდით მყოფი ადამიანი არ მოსწონდა, გეუბნებოდა მასთან არ იმეგობროო. თითქოს ქადაგებდა, როდესაც გესაუბრებოდა.
მისი სიტყვები მზარავს. ბოლოს აღარ მინახავს და ამას განვიცდი. დღეს თავს ძალიან ცუდად ვგრძნობ…
არ ვიცოდი როგორ მივსულიყავი და მეთქვა, რომ ის რაც ამიკრძალა, კვლავ გავაკეთე.
– როდის და ვისგან დაინფიცირდა და უგონო მდგომარეობაში იყო ბოლოს?
– ბოლოს მხოლოდ მედიასაშუალებით ვიგებდი მის ამბავს. არც კი გამიფიქრია, თუ რამე მოხდებოდა მის თავს. არა არა ამას მე ვერ დავუშვებდი, ის რამდენ ადამიანს სჭირდებოდა…
ბოლო რამდენიმე თვე არ მყავდა ნანახი, რადგან ასე დაემთხვა.
