ქეთი მელუას ქმარმა, მოტომრბოლელმა და მუსიკოსმა, ჯეიმს თოსლენდმა მაჯაზე ოპერაცია გაიკეთა. როგორც სპორტსმენი სოციალურ ქსელში პოსტავს, უკვე მეოთხედ დასჭირდა ქირურგიული ჩარევა…
ჯეიმსმა ფეისბუქ-მეგობრებს, ოპერაციის შესახებ ვიდეორგოლით, წინა დღეს შეატყობინა.
“მაჯაზე პრობლემა მქონდა, მესამე პროცედურამ წარუმატებლად ჩაიარა. მაჯის ძვლებზე ისევ მჭირდება ქირურგიული ჩარევა. ვიმედოვნებ, ოპერაცია წარმატებით ჩაივლის და მე ისევ შევძლებ ინსტრუმენტზე დაკვრას და რბოლას.”
მოტომრბოლელი ნიღბით და კლინიკის ხალათით ფოტოს აქვეყნებს – “მეოთხეჯერ იღბლიანად! პროცედურას წარმატებით გავივლი.”
თოსლენდის პოსტებს ასობით თაყვანისმცემლის კომენტარი მოჰყვა, კუმირს გამოჯანმრთელებას და სპორტში მალე დაბრუნებას უსურვებენ.
ჯეიმსი ხშირად ეწევა ქველმოქმედებას. ცოტა ხნის წინ შეფილდის ბავშვთა ჰოსპიტალს სტუმრობდა და ტკბილეული და სათამაშოები მიუტანა პატარებს. ატარებს საქველმოქმედო კონცერტებს, მღერის და უკრავს.
ჯეიმს თოსლენდის შესახებ ქართულ მედიაში პირველად გაზეთი “პრაიმტაიმი” წერდა. 2011 წლის ტაბლოიდის აგვისტოს ნომერში ქართველმა მკითხველმა ქეთი მელუას შეყვარებული გაიცნო. მერე წყვილმა მალევე იქორწინა.
“პრაიმტაიმმა” ბრიტანელ სიძესთან ინტერვიუც ჩაწერა. მას ძალიან სურდა ჩვენთან ჩამოსვლა და ქეთის ლამაზი სამშობლოს საკუთარი თვალით ნახვა. იცოდა “მეჯიქ” ხაჭაპურის შესახებ და მომნუსხველი მთების ფოტოები გუგლში ჰქონდა ნანახი. დანარჩენს კი “ჯორჯიაზე” ქართველი ცოლისგან ისმენდა.
საქართველოში, სხვადასხვა დროს, მარტო ჩამოსული ქეთიც ხშირად ამბობდა, მოუცლელი გრაფიკის გამო, ერთად ვერ ვახერხებთ ჩამოსვლასო. გავიდა წლები, მაგრამ ჯეიმსმა საკუთარი თვალით ვერა და ვერ იხილა “მზის და ვარდების მხარე”.
2013 წლიდან მოყოლებული ხშირად ვრცელდება ხმები ქეთისა და ჯეიმსის დაშორებაზე. ბოლო ჭორი შარშანაც გავრცელდა.
ბრიტანულმა სააგენტო “ტელეგრაფმა” კი შარშან მელუას ინტერვიუ გამოაქვეყნა, სადაც ვარსკვლავი დეპრესიაზე საუბრობს.
ქეთი მელუა: – დეპრესიით ნამდვილად ვიტანჯებოდი, ფსიქოლოგიური პრობლემები შემექმნა. პარანოია მქონდა. ღამ-ღამობით ქრონიკული კოშმარები მიტევდა. თავს ისე ვგრძნობდი, როგორც აპოკალიფსურ ფილმებშია. ორი კვირა რეაბილიტაციის ცენტრშიც დავყავი. საერთო ჯამში ერთი წელი ჰიპნოთერაპიის სესიებში გავატარე. მაგრამ მინდა გითხრათ, რომ გვარში ფსიქიკური აშლილობის პრობლემები არ გვაქვს.
