მაია ჯაბუა გამოდის ინიციატივით, რომ მომღერლები და მუსიკოსები შოუებში ჰონორარის მოთხოვნის გარეშე არ მივიდნენ. მომღერლის ინიციატივა “ფეისბუქზე” მისმა ქალიშვილმა, ლიზა ყენიამაც გააჟღერა. ის წერს:
“მაშინ როცა შენ ხელფასს იღებ იმაში, რომ მიგყავს გადაცემა, ან ხარ რამე გადაცემის პროდიუსერი, მინდა ისიც იცოდე: ვისი დახმარებითაც ქმნი გადაცემას, ვგულისხმობ სტუმარს, რომელიც თავისი ცხოვრების რამდენიმე საათს გითმობს და გიდებს რეიტინგს, უნდა გადაუხადო ფული, რადგან ისიც თავის საქმეს აკეთებს, ისიც მუშაობს და ისიც იმსახურებს ანაზღაურებას.
როგორც გინდათ ისე მიიღეთ, მაგრამ არც ერთ გადაცემაში არ დამიძახოთ, თუ არ გექნებათ გათვლილი ჰონორარი. ძაან ახლოებზეც გადის.”
ჯაბუა “პრაიმტაიმთან” ასახელებს გადაცემას, რომელსაც უჰონორაროდ სტუმრობაზე უარი უთხრა.
მაია ჯაბუა: – ჰონორარი მოვითხოვე – დროა! მიპასუხეს, რომ სამწუხაროდ, ჯერ ეს ჩვენთან არ ხდებაო. თუ ვინმემ არ მოინდომა, არც არასდროს მოხდება.
როდესაც ტელევიზიებს ხარჯთაღრიცხვა აქვს ჩამოწერილი, კეთილი ინებონ და გაითვალისწინონს მომღერლის ჰონორარი, მით უმეტეს მაშინ, როდესაც მუსიკალური ნაწილი აქვს შოუს, იწვევენ მუსიკოსს, მომღერალს, ინსტრუმენტალისტს. ყველამ თავისი ჰონორარი უნდა აიღოს.
რატომ აქვთ ამაზე ტელევიზიებს უარყოფითი რეაქცია და რატომ უკვირთ, ეს მაოცებს. მათ ქრონომეტრაჟს რომ ვავსებთ და რამდენიმე ათასს რომ იღებენ (არავის თანხას არ ვითვლი), ჩვენი შრომაც დააფასონ. ჩვენი შრომაც – შრომაა. დიდი ხანია ბავშვი აღარ ვარ, პროფესიონალი ვარ და მინდა პატივი სცენ ჩემს შრომას.
– გყავთ თანამოაზრეები?
– ძალიან ბევრი. ბევრს ეშინია, რომ ჰონორარის მოთხოვნის შემდეგ, ტელევიზიები არ მიიწვევენ შოუებში და სოლიდარობას არ მიცხადებენ. მე ნამდვილად არ მეშინია. მე ამოვიღებ ხმას. მე რომ ვთქვი, ამ შოუში არ მოვალ-მეთქი, ძალიან უპრობლემოდ იმღერა სხვამ და ის სიმღერები, რაც მე უნდა მემღერა.
არაერთხელ გამიპროტესტებია ჩვენს მიმართ უპატივცემულობა და ამის შედეგიც მიმიღია.
– და კონკრეტულ ჰონორარს უსახელებთ ტელევიზიებს?
– ასე ჰაერში ჰონორარზე ვერ ვისაუბრებ. მინდა ჯერ ეს თემა დღის წესრიგში დადგეს. ყველამ ამოიღოს ხმა და როცა ჰონორარის ციფრებამდე მივალთ, ეს უკვე სხვა თემა იქნება.
