The Queen’s Gambit ნეტფლიქსის ახალი პოპულარული მინისერიალია, რომელიც დიდი პოპულარობით სარგებლობს.

სერიალს საქართველოშიც ჰყავს მაყურებელი და მათთვის ფინალური სერია განსაკუთრებული სწორედ იმიტომ აღმოჩნდა, რომ ფილმში მსოფლიოს ხუთგზის ჩემპიონი ნონა გაფრინდაშვილი ახსენეს.

ფილმში მასზე საუბრობენ: „არსებობს ნონა გაფრინდაშვილი, ის ქალთა მსოფლიო ჩემპიონია, თუმცა ის არასდროს შეხვედრია კაც მოთამაშეს”.

ემოციებისა და კომენტარისთვის „პრაიმამბები“ მსოფლიოს ხუთგზის ჩემპიონ ნონა გაფრინდაშვილს დაუკავშირდა.

– ქალბატონო ნონა, თუ ნახეთ სერიალი?

– არ მინახავს, მაგრამ მითხრეს, არ ვიცი რამ გადარია ყველა. 

რა რეაქცია გქონდათ როცა გაიგეთ, რომ წარმატებულ სერიალში თქვენზე საუბრობდნენ?

– მე გამიკვირდა. ძირითადად რაც გავიგე ინფორმაცია არასწორადაა მიწოდებული. 

როგორ გამორჩათ ეს ნაწილი არ ვიცი, ყველამ იცის ამის შესახებ. მე, როგორც კი 1962 წელს მსოფლიო ჩემპიონი გავხდი, მიმიწვიეს ტრადიციულ საერთაშორისო ტურნირზე სადაც კაცები თამაშობდნენ და მარტო მე ვიყავი ქალი. 

– აპირებთ, რომ სერიალს უყუროთ?

– არ ვიცი, ამ ერთი ეპიზოდის გამო მთლიანი სერიალის ყურებას ვერ დავიწყებ, მაგრამ ფაქტია, რომ ამან დიდი ინტერესი გამოიწვია და როგორ მოხდება არ ვიცი.