ლეგენდარული ტელესახის – ჯულიეტა ვაშაყმაძის გარდაცვალებით გამოწვეულ გულისწყვეტას ბევრი გამოხატავს. სილამაზისა და ნიჭიერების ასეთ სინთეზს ხშირად ვერ შეხვდები. ალბათ, ამიტომაც იყო, რომ ეპოქალური ჟურნალისტის ნიჭიერებას კინორეჟისორებმაც ვერ აუქციეს გვერდი. შოთა მანაგანიძის (“ყვავილი თოვლზე”) და ნიკოლოზ სანიშვილის (“თოჯინები იცინიან”) ფილმებში შესრულებული როლების შემდეგ, ჯულიეტას, თავის დაუვიწყარ “არაჩვეულებრივ გამოფენაში”, ეპიზოდური როლი შესთავაზა ელდარ შენგელაიამ.
უფროსი ძმებისგან გაწამებული “გასათხოვი გოგონას” როლი არაჩვეულებრივად შეასრულა და როგორც მაესტრო იხსენებს, შენიშვნის გარეშე და დამღლელი დუბლების გარეშე ითამაშა.
ელდარ შენგელაია: – ძალიან ნიჭიერი ადამიანი იყო. მომწონდა ვიზუალურად, მომწონდა მისი მეტყველება და გადავწყვიტე, რომ “არაჩვეულებრივ გამოფენაში” ეთამაშა. კარგი კომენტატორი და ჟურნალისტი ხომ იყო და შესანიშნავად ითამაშა ჩემს ფილმში ეპიზოდური როლი. შევთავაზე თუ არა, უცებ დამთახმდა.
ძალიან ზუსტად შეასრულა როლი, ისე როგორც მინდოდა. ჯულიეტას სცენებს ორი დღე ვიღებდი. მივეცი სცენარი და დავიწყეთ თუ არა გადაღება, არანაირ პრობლემას არ წავწყდომივარ. ისე მეტყველებდა, როგორც სცენარში ეწერა. ადვილად შეასრულა როლი, ძალიან ნიჭიერი ადამიანი გახლდათ. არავითარი შენიშვნა არ მქონია. მომწონს ამ პატარა როლში. სხვა ფილმში მერე მისი ადგილი აღარ იყო.
ძალიან გული მწყდება, რომ გარდაიცვალა. ვუსამძიმრებ მის ოჯახს…
