პეტრე კოლხის ოჯახის ყველა წევრი – ცოლი, ექვსი შვილი და შვილიშვილი კოვიდინფიცირებულია. უფროსი შვილი, მარიამი ისევ კლინიკაში აგრძელებს მკურნალობას. სახლის პირობებში მკურნალობს სხვა დანარჩენი. სასულიერო პირმა თქვა, რომ მისმა შვილიშვილმა ზუმ კოვიდი დაამარცხა და ის კლინიკიდან გაწერეს.
პეტრე კოლხი: – ღმერთს მადლობა, ამ ეტაპისთვის ყველას მდგომარება დამაკმაყოფილებელია, მაგრამ რა შეიძლება მოხდეს, წინასწარ ეს არავინ იცის. სრულ განკურნებამდე ჯერ კიდევ შორია. ვიტოვებ იმედს, რომ ყველა დაამარხებს ამ ინფექციას, არა მხოლოდ ჩემი ოჯახის წევრები.
ჩემს ცოლ-შვილს სახლში აკითხავთ ოჯახის ექიმები და პროცედურებს უტარებენ. ჩემს მეუღლეს ფილტვის ტომოგრაფია დასჭირდა. ამისთვის კლინიკაში უნდა მივიდეს. ბავშვების მკურნალობა ოჯახში მიმდინარეობს.
ზუ კი გამოწერეს დღეს, მაგრამ ჩემს ოჯახში, ჩემს გარდა, ყველა ინფიცირებულია და როგორ მივიყვანო სახლში? შეიძლება ბავშვს ისევ შეუბრუნდეს, თუ მას ინფიცირებულთან ექნება ურთიერთობაო, მითხრეს. ზუს მამასაც დაუდგინდა კორონა. მარიამი მკურნალობის კურსს ისევ გადის კლინიკაში.
– და სად მიგყავთ პატარა?
– ამაშია საქმე. ვფიქრობთ და ვმსჯელობთ, სად უნდა წავიყვანოთ პატარა. ჩემთან სახლში ხუთი ინფიცირებულია. მარიამი კლინიკაშია, ზუს მამაც ინფიცირებულია. მე ქუჩაში ვარ და პატარას მოვლაც არ ვიცი, ხელშიც ვერ ვიჭერ, რამე რომ არ ვატკინო. ახლა ვფიქრობ, რა შეიძლება ზუს მოვუხერხოთ.
– როგორ გგონიათ, როგორ დაუძვერით ვირუსს?
– იმდენ რამეს ვუძლებ ჩემს ქვეყანაში, კორონა იმასთან შედარებით, ზღვაში წვეთია. მე ვფიქრობ, კორონას თვითონ შეეშინდა ჩემი, როგორც კი მომიახლოვდა და უკან დაიხია. ყველანაირი იმუნიტეტი მაქვს გამომუშავებული და რაც მეტად მებრძვიან, მით მეტად ვძლიერდები.
