უკვე მესამე წელია საქართველოს პრეზიდენტის, სალომე ზურაბიშვილის საპარლამენტო მდივანს, დიმიტრი გაბუნიას ტრადიციად აქვს, იუბილარ რჩეულს ას ვარდს ჩუქნის.
ადვოკატმა გასული წლის ოქტომბერში აკა ქუმსიაშვილზე იქორწინა. აკა ხელმძღვანელობს კომპანიებს – საადვოკატო ბიურო “გაბუნია და პარტნიორები”, GS Legal-ი და ადვოკატთა სკოლა.
დღეს კი იუბილარმა აკამ თავის “სთორიზე” გამოაქვეყნა ფოტო, თუ როგორ ახარისხებს ვარდებს მისი ბებია.
ამ ტრადიციის შესახებ “პრაიმამბებს” სწორედ იუბილარმა უამბო.
აკა ქუმსიაშვილი: – უკვე მესამე წელია, ტრადიციულად, 12 საათზე დიმა სახლში 100 ვარდით მოდის. მანამდე 3 და 8 მარტია და უკვე 10 მარტს, სახლში ყვავილების დღესასწაული მაქვს.
ძირითადად, მეგობრების დიდი და საერთო წრით ვხვდებით ხოლმე ამ დღეს, თუმცა წელს მხოლოდ ჩვენ ორს მოგვიწია საღამოს გატარება.
დიმას სიურპრიზები ასი ვარდით არ მთავრდება. მისგან ყოველთვის საოცრებებია მოსალოდნელი. თუ არ გეწყინებათ, წლევანდელ სიურპრიზს საიდუმლოდ დავტოვებ…
წყვილის ცხოვრებაში სხვა სიახლე, ჯერჯერობით, არ არის. მოგზაურობამონატრებული აკა “ფეისბუქზე” პარიზის ფოტოს აქვეყნებს.
“სამწუხაროდ, პანდემიის გამო მოგზაურობას ვერ ვახერხებთ. სამსახურიდან გამომდინარე წელიწადში რამდენჯერმე მიწევდა ევროპაში მოგზაურობა. ეს ფოტო ძველია…” – ამბობს აკა.
პანდემიამ წყვილს საქორწინო მოგზაურობაც ჩაუშალა და დაგეგმილი გრანდიოზული ქორწილიც.
დიმიტრის პირველი ქორწინებიდან 20 წლის ნიკუშა ჰყავს, აკას კი – ათი წლის ნინიკო.
