„იუვენტუსის“ ფორვარდის კრიშტიანო რონალდოს ძმა უგო ავეირუ თაღლითობაშია ეჭვმიტანილი. კერძოდ, ის რეალიზაციას უწევდა საფეხბურთო მაისურებს, რომლებიც უტილიზაციას ექვემდებარებოდა. ამის შესახებ გაზეთმა „ლა რეპუბლიკამ“ დაწერა.
წყაროს ცნობით, კომპანია Mussara-მ, რომელსაც რონალდო ფლობს და ავეირუ მართავს, ტურინულ კომპანია Pegaso-ს შეუკვეთა სპეციალური მაისურები ლოგოტიპით – CR7Museu. პარტიის ღირებულება 500 ათას ევროს შეადგენდა. ამის შემდეგ, Mussara-მ განაცხადა, რომ არ გაუცია ნებართვა წარმოებაზე და მოითხოვა, რომ ყველა მაისური მისთვის გადაეცათ გასანადგურებლად – თითო ოთხ ევროს საფასურად.
Pegaso-ს თანამშრომლები კი ირწმუნებიან, რომ ნახეს ასეთი მაისურები კრიშტიანო რონალდოს მუზეუმში – თითო 40 ევროდ იყიდებოდა. ტურინულმა კომპანიამ Mussara-ს სასამართლოში უჩივლა, ავეირუს მიმართ კი გამოძიება დაიწყო.
