„მეგრული Day Off-ები” – ასე დაასათაურა ლაშა კანკავამ რომანტიკული, კომედიური ჟანრის სრულმეტრაჟიან მხატვრულ ფილმი (დრამის ელემენტებით), რომელიც სამეგრელოს ისტორიაზე, კულტურაზე, ტრადიციებზე, სამზარეულოსა და სხარტ იუმორზე მოგვითხრობს.
როგორც ლაშა გვიყვება, ფილმში წარმოჩენილი იქნება სამეგრელოს შვიდივე რაიონსა და ასევე ფოთში არსებული, ისტორიულად და ტურისტულად მნიშვნელოვანი, ცნობილი და ნაკლებად ცნობილი ადგილები, კუთხური თავისებურებები და ბევრი სხვა საინტერესო დეტალი.
ლაშა კანკავა: – სცენარს წელიწადი და ორი თვე ვწერდი. ჯერ ისევ ვხვეწ. წარმოშობით მარტვილიდან ვარ და კარგად ვიცნობ სამეგრელოს. შეიძლება ითქვას, ფეხით მაქვს მოვლილი. ზაფხულს სოხუმში ვატარებდი ხოლმე. ომის შემდეგ კი მარტვილში, სენაკში, ფოთში და ასე შემდეგ… დღემდე მჭიდრო კონტაქტში ვარ სამეგრელოსთან.
ფილმის კონსულტანტი თემურ ბაბლუანია. მასთან საუბარში აღმოვაჩინე, რომ თურმე მისი ბაბუა, დედის მხრიდან, ილია მეორემდე, ცხუმ-აფხაზეთის მიტროპლიტი, ლეონიდე ჟვანია გახლდათ.
ბატონ თემურს სცენარი წავაკითხე, მოეწონა, – დიდ პოტენციალს ვხედავ ამ სცენარშიო. გარკვეული რჩევები და შენიშვნები მომცა. ანთებული და მონდომებული ხარ და უფლება არ მაქვს, ჩემი გამოცდილება არ მოგახმაროო, მითხრა.
ფილმისთვის მუსიკას (საუნდთრეკს) ნიაზ დიასამიძე დაწერს. ფილმში ითამაშებენ: რეზო ჩხიკვიშვილი თავის მეუღლესთან, ხათუნა ჩარგეიშვილთან ერთად. ეკა მჟავანაძე, ზურა ინგოროყვა, ბაჩო ქაჯაია, გიორგი ცაავა, ჯანო იზორია და სხვები.
რაც შეეხება დაფინანსებას, ჯერჯერობით, პატარ-პატარა ფინანსური მხარდამჭერები გვყავს, რომლებმაც შეგვიძინეს მინივენი და მიმდინარე მოსამზადებელ ხარჯებს გვიფარავენ. პარტნიორი სასტუმროების თემა მოგვარებულია, ლოკაციები – მოძიებული. ფინანსურად გვეხმარებიან ამერიკაში მყოფი ჩვენი თანამემამულეებიც – მზია წულიკიძის ხელმძღვანელობით, რომელიც ჩემმა მეგობარმა, ასევე ემიგრანტმა, თამარ ზოიძემ გამაცნო. ახლა ჩემს ასისტენტ, თამარ სურმავასთან ერთად ვმუშაობთ ბიუჯეტის მთავარი ნაწილის მოძიებაზე. ყველა ბიზნესმენთან მივდივართ. ძირითადად, მაინც მეგრელებთან. მეგრელმა ხომ უკეთ იცის, ამ კუთხის ხასიათი. ამიტომაც ვცდილობ, მეტწილად მათ მივმართო.
