ნინო ნადირაძე-კუზანოვა 48 წლის გახდა. ასაკი თვითონ გაგვიმხილა. დღეს იუბილარია “პრაიმშოუს” მეორე თანაწამყვანიც – ირაკლი მაქაცარიაც. ნინო მასთან მიეშურება, თუმცა აღიარებს, რომ წვეთ ალკოჰოლს ვერ მიიღებს. ვაქცინაციის მეორე დოზამდე, ალკოჰოლის მიღება რეკომენდებული არ არის. პირველი აცრა კი ნინომ შვიდი დღის წინ გაიკეთა.
ნინო ნადირაძე: – შეფერებული მაქვს ასაკის მიერ მოტანილი სიდარბაისლე. ასაკი რომ დავმალო, რა ვუყო ეზოს, ბაღს, სკოლას, ინსტიტუტს… იმდენი მოწმეა, ამ ხალხს ხომ არ გავწყვეტ?!
ყველა ასაკის ხიბლი უნდა ვნახოთ და ამ ქვეყნიდან ახალგაზრდები არ წავიდეთ. ჩემი შვილიშვილის ძიძამ, რომელიც ჩვენი ოჯახის წევრია, ძალიან მაგარი კომპლიმენტი მითხრა. ბავშვი მეჯდა კალთაში და ციცომ გურული ტონით მომაძახა: ნინიკო, შენ ასაკიზა, თანამდებობიზა და ბებიობიზა შეუფერებელი ხარო. ეს იყო ყველაზე გემრიელი კომპლიმენტი, რაც კი ვინმესგან მიმიღია.
ბედნიერი ვარ, რომ შვილიშვილი მყავს. არნახული გრძნობა ყოფილა. ვერასდროს ვხდებოდი ჩემი ბებიები, ასეთი უავესი ქალები, შვილიშვილებთან რბილები რატომ იყვნენ. უკვე მივხვდი, შვილიშვილი თურმე განსაკუთრებული შეგრძნების მომტანი ყოფილა.
მიხარია, რომ ვბერდები-მეთქი, რომ ვთქვა, მოვიტყუებ. საერთოდ ვერ ვგრძნობ, რომ ამ ასაკის ვარ და პასპორტში რომ გადავაწყდები, მანადგურებს.
ასაკის მატებას ვგრძნობ იმაში, რომ მოლხენისკენ და გართობისკენ ნაკლებად ვარ უკვე ორიენტირებული. მომართული ვარ სამსახური-სახლისკენ. სადაც არ უნდა ვიყო, სახლისკენ მიმეჩქარება, როცა, ახალგაზრდა ასაკში, სულ არ მინდოდა სახლისკენ გახედვა.
ამ დღეს გუგა ცდილობს ხოლმე სიურპრიზი მომიწყოს. დღეს ჯერ არ ვიცი, რას ამზადებს. ადრე გავიპარე სამსახურიდან. ვიცი, სახლში მელოდება.
პირველად ჩემს ცხოვრებაში, ამ დღეს მივდივარ სხვის დაბადების დღეზე. ირაკლი მაქაცარიაც იუბილარია. თან ორივე ხარის წელში ვართ დაბადებული. ვიწრო წრეში, დროში ლიმიტირებულად გაწერილ დაბადების დღეს იხდის. ცხრაზე სახლებში უნდა ვიყოთ.
წვეთ ალკოჰოლს ვერ დავლევ. მეორე აცრამდე ალკოჰოლი არ არის რეკომენდებული. ჩემი თავი მიყვარს-მეთქი, ტყუილად კი არ ვთქვი.
