რა ჩავიცვათ ახალი წლის ღამეს – ეს კითხვა მუდმივად აქტუალურია დეკემბრის მიწურულს. და ყოველთვის, დიზაინერები და ასტროლოგები სხვადასხვა რჩევებს გვაძლევენ.
ასტროლოგები ამბობენ, რომ თეთრი მეტალის ხარის წელი მოდის და ღია ფერებზე უნდა გავაკეთოთ აქცენტი, ალისფერი სამოსი კი, სხვა დღესასწაულისთვის გადავინახოთ. და თუ ისინი ბრჭყვიალა აქსესუარების გამოყენებისგან თავის შეკავებას გვთხოვენ, დიზაინერები საპირისპიროს გვირჩევენ.
ავთანდილ ცქვიტინიძე და ქეთი ჩხიკვაძე წელს საახალწლო ღამის მთავარ ატრიბუტად – განწყობას და ჩვენთვის სასურველი სამოსის ჩაცმას ასახელებენ. აი, რა რჩევები მოგვცეს დიზაინერებმა “მთავარის დილაში”.
ქეთი ჩხიკვაძე: – ბრუნდება ქალური სილუეტი. მოდით გადაღლილმა დიზაინერებმა, წელს დაისვენეს და ახალი ერა იწყება მოდის ინდუსტრიაშიც.
რაც შეეხება ახალი წლის ღამეს, ჩავიცვათ ფერადი სამოსი, შეგვიძლია კარადაში ახალი სამოსის გამოძებნა, რაც წელს არ გვცმია. მთავარი კი მაინც განწყობაა, შეიძლება ხალათით შეხვდე ახალ წელს, მაგრამ ამაღლებული განწყობით. ასეთი რთული წლის ბოლოს, მაქსიმალურად უნდა შევიქმნათ გადასარევი განწყობა. ყველაფერი წინ არის.
ახალ წელს ბრჭყვიალა ყოველთვის აქტუალურია. არავის არ უნდა შეეშინდეს წითელი ფერის სამოსის ჩაცმა იმისთვის, რომ ხარის წელი მოდის.
ავთანდილ ცქვიტინიძე: – მაშინ მაგ ასტროლოგიური ლოგიკით, თოვლის ბაბუა უნდა ამოვაგდოთ ახალი წლიდან (იცინის).
მე მიმაჩნია, პირველად დადგა ის დრო, როდესაც არ უნდა მიჰყვე არანაირ მოცემულობას და ჩვენი ხასიათის პრეზენტაცია გავაკეთოთ ტანსაცმლით ისე, როგორც ჩვენ გვინდა. თუ ვინმე ამაზე ან გაიცინებს, ან გაგვაკრიტიკებს, ეს ჩვენი პრობლემა არ არის.
წელს ახალ წელს ყველა ოჯახში შეხვდება, დავუბრუნდით ტრადიციას. ეს მაინც ოჯახური ზეიმია. ბევრი ირმიანი ნაქსოვი ზედა ჩავიცვათ, პლედი მოვიხვიოთ, ერთი ჭიქა ღვინო მივირთვათ და დადებითი ენერგეტიკით დავიმუხტოთ. ამით შევივსებით და იმედია, უფრო კარგ წელს დავიწყებთ.
კოვიდის თემა ბევრმა დიზაინერმა გამოიყენა თავის კოლექციაში და ყველა ბრუნვაში ატრიალა. იმედია, პანდემია რომ დამთავრდება, ეს დიზაინერები არ გაკოტრდებიან, რადგან ისევ ფაჩუჩებით და ჰუდებით სიარული, არა მგონია, კიდევ ვინმეს მოუნდეს.
მე პირადად გამიჩნდა სურვილი, რომ შავიდან თეთრზე გადავსულიყავი. პირველად გავაკეთე გრაფიკული კოლექცია. თეთრი ფერი ახალი ფურცლიდან დაწყებაა. ჩვენზეა დამოკიდებული, თუ როგორ გავაფერადებთ ამ თეთრ ფურცლებს. მომხმარებელს ვაძლევ არჩევანს, თვითონ შექმნას თავისი ცხოვრება და ისე გადაფურცლოს, როგორც ამის სურვილი აქვს.
