საქართველოს სამეფო ოჯახი ახალი წევრის მოლოდინშია. ამ სიახლის შესახებ ბატონიშვილებმა იოანე და ქრისტინე ბაგრატიონ-მუხრანელმა საზოგადოებას თავად ამცნეს.
სამეფო პირმშო თებერვალში დაიბადება. სად გაიზრდება და როგორ ბაგრატიონების დინასტიის შთამომავალი, ამის შესახებ ქრისტინე და იოანე ბაგრატონებმა ჟურნალ “თბილისელებს” თავად უამბეს.
– როგორი იყო პირველი ემოციები, როცა პატარას არსებობის შესახებ შეიტყვეთ?
იოანე: ამ სიახლის შესახებ ქრისტინესგან შევიტყვე საოჯახო შეკრებისას. შემიძლია ვთქვა, რომ ეს იყო ყველაზე ბედნიერი დღე ჩემს ცხოვრებაში. როცა იგებ, რომ მამა იქნები, ცხოვრება მშინვე განსაკუთრებულ მნიშვნელობას იძენს, თითქოს ძალას გმატებს იმისთვის, რომ უკეთესი გახდე.
– ქრისტინე, როგორ უთხარით ამის შესახებ მეუღლეს?
ქრისტინე: ეს მართლაც გასაოცარი და დაუვიწყარი მომენტი იყო ჩემს ცხოვრებაში. ორსულობის დადასტურების შემდეგ, გადავწყვიტე, რომ ეს სიახლე იოანესთვის სიურპრიზის სახით გამეცნო. ერთ საღამოს ოჯახური შეკრების დროს, იოანეს გადავეცი კონვერტი, სადაც ეწერა: მამა, ველოდები შენთან შეხვედრას.
კონვერტის გახსნის შემდეგ, რამდენიმე წამი თითქოს ვერაფერი ვერ თქვა, შემდეგ უბედნიერესი თვალებით შემომხედა, მივულოცეთ ერთმანეთს და ულამაზესი საღამო გავატარეთ ჩვენი ოჯახის წევრებთან ერთად.
– სად დაიბადება და გაიზრდება სამეფო ოჯახის მომავალი წარმომადგენელი?
იოანე: ჩვენი შვილი ჩვენს ქვეყანაში, საქართველოში დაიბადება. იგი გაიზრდება ქართული ტრადიციების შესაბამისად, მას ასევე, მჭიდრო კავშირი ექნება ჩემს ესპანურ და ევროპულ ფესვებთან.
– რა ტრადიციების დაცვით გაიზრდება თქვენი შვილი – როგორც სამეფო ოჯახის წარმომადგენელი?
– ჩვენი შვილი გაიხრდება როგორც ჩვეულებრივი ბავშვი, რადგან ყველა ბავშვი ერთნაირია, მათ სჭირდებათ სიყვარული, ყურადღება და მზრუნველობა, ეს ყველაზე მნიშვნელოვანია.
– სად ატარებს უმეტეს დროს თქვენი ოჯახი და რით ხართ დაკავებულები?
– ჩვენ უმეტეს დროს საქართველოში ვატარებთ, სადაც არის ჩვენი სახლი და ქრისტინეს ჰყავს მთელი ოჯახი. წელიწადში რამდნჯერმე ვმოგზაურობთ ესპანეთში, დედაჩემისა და ჩემი ოჯახის წევრების მოსანახულებლად, ასევე სხვადასხვა ქვეყნებში ბიზნესისა და საქმიანობისთვის. უცხოური ინვესტიციების მოსაზიდად და საქართველოს პოპულარიზაციისთვის.
