გურამ შარაძის ქალიშვილი, რუსუდან შარაძე სოციალურ ქსელში მიმართვას ავრცელებს და საზოგადოებას მოუწოდებს, ილო ბეროშვილს შეეშვან.
“მოუხდია ბოდიში ილო ბეროშვილს. ბერბიჭაშვილი უნდა მეთქვა და მექანიკურად წამომცდაო. მისი ბაბუა ილია ჭავჭავაძის სახლ-მუზეუმის დირექტორი ყოფილა ოდესღაც და ბავშვობიდან მესმოდა ისტორიები, მათ შორის, გურამ შარაძეზეო.
ბაბუისგან კარგის მეტი რა უნდა გაეგო?! მოკლედ, ასეა თუ ისე, ჩემო უსაყვარლესო მეგობრებო, შევეშვათ ამ კაცს.
საკმარისზე მეტი მოხვდა. რამდენად გულწრფელია მისი ახსნა-განმარტება, აღარ მაინტერესებს.
ბოდიშის მოხდა ასეთ მძიმე შეურაცხყოფასა და გულსტკენას მომენტალურად ვერ შველის, მაგრამ გამიხარდა. ე.ი. არ ყოფილა მთლად წყალწაღებული, ხვდება და აღიარებს, რომ ცუდად მოიქცა. ეს ყველას არ შეუძლია. ადამიანები ვართ და შევუნდოთ. ყოველ შემთხვევაში, მე ,,განიარაღებული” ვარ”-წერს შარაძის ქალიშვილი.
შეგახსენებთ, მსახიობმა ილო ბეროშვილმა, გადაცემაში თვითიზოლაცია განაცხადა, რომ გურამ შარაძე ყველაზე ცუდი ქართველია. რის გამოც მას მკაცრად აკრიტიკებენ. როგორც ბეროშვილმა მოგვიანებით განმარტა, მას შარაძის ნაცვლად ბერბიჭაშვილი უნდა დაესახელებინა და ბოდიში მოიხადა.
