“ზამთრის მარაგი” – ასე ჰქვია სოციალური ტიპის აქციას, რომელიც ერთმა სამეგობრომ ნოემბრის ბოლოს წამოიწყო.
ლოქდაუნის დროს, უფუნქციოდ დარჩენილ ბარს, გიორგი გოგილაშვილმა კეთილი საქმით ახალი სიცოცხლე შთაბერა. მის ბარში (და არა მხოლოდ იქ) სოციალურად დაუცველთათვის გროვდება თბილი ტანსაცმელი.
გიორგი გოგილაშვილი: – მეგობრებმა მოვიფიქრეთ, რომ მათ, ვისაც ტანსაცმლის ყიდვის საშუალება არ აქვს, შევუგროვოთ თბილი სამოსი. თბილ სამოსს კი სხვადასხვა ლოკაციაზე ვაგროვებთ. ერთი წერტილი ჩემთან ბარშია, ოპერის გვერდით – “პიანი ბაზარში”, რომელიც ახლა უფუნქციოდ არის და სამოსის ჩამბარებელ პლათფორმად გამოვიყენეთ. ბევრი მსურველია… მოაქვთ ტანსაცმელი.
გუშინ გურამ ბაღდოშვილიც შემოგვიერთდა და მის რესტორანშიც, რომელმაც გუშინ უპოვართათვის წვნიანის გაცემა დაიწყო, შეუძლიათ სამოსის მიტანა. ცენტრალური პუნქტი წერეთლის 72-ში გვაქვს. ზურა ნიჟარაძეს და ანუკა მუზაშვილს სოციალურად დაუცველთა ბაზა აქვთ. იქ აფასოვებენ სამოსს და მერე ნაწილდება ბენეფიციარებთან.
გროვდება პროდუქტებიც. გუშინ ასი ლარი დაგვერიცხა, წავედი და ამ თანხის პური მივუტანე გურამს თავის რესტორანში, რომ სადილზე მისულისთვის, წვნიანთან ერთად, პურიც გაეტანებინა.
ემიგრანტების გამოგზავნილი ფულით ვაკეთებთ პირველადი მოხმარების პროდუქტების კალათებს და მიგვაქვს სოციალურად დაუცველთა სახლებში. თითო კალათა – სამკაციანი ოჯახისთვის, დაახლოებით 70 ლარამდე ჯდება.
ვწერთ პროდუქტების კომპანიებს, ვისაც რისი სურვილიც აქვს, გადმოგვცენ და ჩვენ დავარიგებთ.
