ცნობილი ქართველი ქალი, მოდის კრიტიკოსი დალი ჩიტალაძე მუმდივად შესანიშნავ ფორმაშია და ის საკუთარ ასაკთან შედარებით ბევრად უფრო ახალგაზრდულად გამოყურება.
როგორ ინარჩუნებს გლუვ სახის კანს და ახალგაზრდულ იერს, ამის შესახებ ცნობილმა მანდილოსანმა „პრაიმამბებს“ უამბო.
– ქალბატონო დალი, როგორ ინარჩუნებთ ახალგაზრდულ და ჯანსაღ კანს?
– პირველი რჩევა არის, არ მოწიოთ ქალბატონებო! ვინც ეწევა მათ უნდა იცოდნენ, რომ მოწევაზე თავის დანებება ძალიან მარტივია. მეშვიდე წელია რაც აღარ ვეწევი და ბედნიერი ვარ, თურმე რა კარგი ყოფილა სიგარეტის გარეშე ცხოვრება.
მე ჩემს გვერდზე არასოდეს ვაკეთებ იმის რეკლამირებას, რაც ვიცი რომ არ ვარგა. ერთხელ კინაღამ შეცდომაში შევედი, გასახდომი კოქტეილების რეკლამა შემომთავაზეს, გამოცდილი არ მქონდა ჩემს თავზე და ავჩქარდი. გახდომა არის მხოლოდ პირის დაკეტვა. ყველანაირი კოქტეილები სისულელეა.
ადამიანისთვის მნიშვნელოვანია სრულფასოვანი კვება. როგორც ვიკვებებით ისე გამოიყურება ჩვენი სახის კანი, თმა და ფრჩხილები.
– ერთ-ერთ ინტერვიუში განაცხადეთ, რომ ძილის წინ C ვიტამინის მიღება სახის კანისთვის სასარგებლოა…
– C და D ვიტამინები აუცილებელია ადამიანისთვის. C ვიტამინი ხელს უწყობს ზრდის ჰორმონს, ის ბავშვებისთვისაც რეკომენდირებულია, რადგან ხელს უწყობს უჯრედების რეგენერაციას.
როდესაც გვძინავს, სწორედ მაშინ ხდება ჩვენი კანის რეგენერაცია.
– როგორ იწყება თქვენი დილის რიტუალი?
– დილით სანამ შხაპს მივიღებ ვცდილობ სახეზე ნიღაბი წავისვა. 15-20 წუთი მაქვს ეს ნიღაბი და შემდეგ ვიღებ შხაპს. მნიშვნელობა არ აქვს სახლში დამზადებულ ნიღაბს დაიდებთ თუ მზას იყიდით. ის აუმჯობესებს სისხლის მიმოქცევას. ასევე მიყვარს პაჩები, რომელიც ძალიან იაფად იყიდება.
დროის სიმცირის გამო, ძირითადად ვყიდულობ ნიღბებს, მაგრამ ზაფხულში სახეზე მარწყვიც წამისვია, კენკრაც და მაწონიც.
კვირაში სამჯერ ვიყენებ სახის სკრაბს, მაგრამ ყოფილა როცა სკრაბი გამთავებია და მჭადის ფქვილი გამომიყენებია მკვდარი უჯრედების მოსაცილებლად.
ვინც დილით სამსახურში მიდის, ნიღბის წასმის შემდეგ, სახე უნდა გაიწმინდოთ მატონიზირებელი ლოსიონით, შემდეგ წაისვით დამატენიანებელი კრემი და ბოლოს გაიკეთეთ მაკიაჟი. რაც შეეხება საღამოს რუტინას, მეიკაფით და დაუბანელი სახით დაძინება არ შეიძლება, ჩათვალეთ იმ ღამეს ბერდება თქვენი კანი.
თვალზე მაკიაჟს ნივეას, გარნიეს და ლორეალის ზეთით ვიშორებ. ის არ აღიზიანებს თვალს. ასევე რეკომენდირებულია შრატი და ბოლოს ღამის კრემის წასმა. რაც არ უნდა დაღლილები იყოთ, აუცილებლად ჩაიტარეთ ეს პროცედურები და ერთ საათში ან საათნახევარში დაიძინეთ.
